Nokia֊ն հեռանում է Ռուսաստանից

Ֆիննական Nokia հեռահաղորդակցական ընկերությունը հայտարարել է Ռուսաստանում աշխատանքի դադարեցման մասին։

«Ուկրաինա ներխուժման առաջին իսկ օրերից Nokia-ի համար պարզ էր, որ իր հետագա ներկայությունը Ռուսաստանում հնարավոր չէ: Վերջին շաբաթների ընթացքում մենք դադարեցրել ենք մատակարարումները և մեր սահմանափակ R&D գործունեությունը տեղափոխել ենք Ռուսաստանից դուրս: Մենք այժմ հայտարարում ենք ռուսական շուկայից մեր դուրս գալու մասին»,- ասվում է ընկերության հայտարարության մեջ։

Այնուամենայնիվ, Nokia-ն մտադիր է շարունակել պահպանել հեռահաղորդակցության ցանցերը Ռուսաստանում և դիմելու է լիցենզիաների համար, որոնք անհրաժեշտ են պատժամիջոցների ներքո այդ աջակցությունը տրամադրելու համար:

Նախօրեին, ինչպես հայտնի է, շվեդական Ericsson ընկերությունը, որը Nokia-ի և չինական Huawei-ի հետ միասին հեռահաղորդակցության սարքավորումների համաշխարհային մատակարարներից մեկն է, դադարեցրեց աշխատանքը Ռուսաստանում։

Ընկերության կայքում տեղադրված հաղորդագրության մեջ դա բացատրվել է վերջին իրադարձություններով և ԵՄ պատժամիջոցներով Մոսկվայի դեմ՝ ի պատասխան Ռուսաստանի՝ Ուկրաինա ներխուժման։