Պատրաստ լինել ակտիվ գործողությունների. Հականացիստական ճակատի ղեկավարը դիմել է համախոհներին

«2018 թվականի հեղաշրջումից առաջ, նախկին իշխանությունների կողմից այսպես կոչված ընդիմադիր որեւէ ակտիվիստի նկատմամբ ամենափոքր ուժ կիրառելու դեպքում, ԱՄՆ դեսպանատան եւ արեւմտյան բոլոր կառույցների կողմից, միանգամից, հնչում էին իշխանությանը դատապարտող հայտարարություններ։ Վերջին 4 տարիների ընթացքում, ԱՄՆ դեսպանատունը եւ բոլոր մյուս արեւմտյան կառույցները աչք էին փակում Նիկոլ Փաշինյանի բոլոր տեսակի ապօրինությունների վրա։ Հետեւաբար համարում ենք, որ իշխանության վերջին 4 տարիների ապօրինություններն ու հանձագործություններն ուղղակիորեն ուղղորդվել եւ խրախուսվել են Հայաստանում ԱՄՆ դեսպանատան եւ մյուս արեւմտյան կառույցների կողմից։

Այսօր, Երեւանի Ազատության հրապարկում, ՀՀ ոստիկանությունը չարդարացված ուժ կիրառեց ցուցարարների նկատմամբ։ Եվ կրկին, Արեւմտյան երկրների դեսպանատները եւ, այսպես կոչված, իրավապաշտպան կառույցները լուռ են։ Արդեն տեւական ժամանակ է, ինչ ԱՄՆ ֆինանսավորմամբ, ՀՀ ոստիկանությունում իրականացվում են, այսպես կոչված, բարեփոխումներ։ ԱՄՆ ֆինանսավորմամբ Հայաստանում ներդրվում է պարեկային նոր ծառայության համակարգ։

2022 թվականի ապրիլի 16-ին Գյումրիյում եւ Վանաձորում Փաշինյանը մասնակցել է Պարեկային ծառայության Շիրակի եւ Լոռու մարզերի ստորաբաժանման աշխատանքների մեկնարկին նվիրված միջոցառումներին։ Այդ միջոցառումներին մասնակցել են նաեւ Հայաստանում Եվրոպական միության պատվիրակության ղեկավար, դեսպան Անդրեա Վիկտորինը, ԱՄՆ արտակարգ եւ լիազոր դեսպան Լին Թրեյսին։

Հաշվի առնելով, որ Ադրբեջանի հետ, անհապաղ, այսպես կոչված, խաղաղության պայմանագիր կնքելու, Արցախը վերջնականապես Ադրբեջանին հանձնելու եւ Արցախը հայաթափելու գործընթացները փորձ է արվում իրականություն դարձնել ԱՄՆ եւ Մեծ Բրիտանիայի պատվերով եւ իրենց աշխարհաքաղաքական շահերից ելնելով, ապա ունենք բոլոր հիմքերը մտածելու, որ ԱՄՆ կողմից ՀՀ ոստիկանության բարեփոխումների ֆինանսավորումն հետապնդում է ՀՀ ոստիկանության ղեկավարության հավատարմությունը շահելու եւ ՀՀ ոստիկանության ղեկավարությանը, Արցախի վերջնական կորստի եւ հայաթափմանն ուղղված գործընթացների դեմ ընդվզողների նկատմամբ բիրտ ուժ կիրառելու քարտ բլանշ տալու նպատակ։

Ելնելով վերոգրյալից դիմում ենք հակաարեւմտյան ճակատում գործող մեր բոլոր համախոհներին պատրաստ լինել ակտիվ գործողությունների, թե համացանցում եւ նաեւ փողոցային ակցիաներում։ Եթե ՀՀ ոստիկանությունը շարունակի կոպիտ եւ բիրտ ուժ կիրառել ցուցարարների նկատմամբ, ապա մենք կունենանք բոլոր հիմքերը համարելու, որ դա ԱՄՆ դեսպանատնից եկող ուղիղ հրահանգ է եւ Հայաստանում կսկսենք անզիջում հակաամերիկյան շարժում՝ մեր փողոցային ցույցերը տեղափոխելով ԱՄՆ դեսպանատան եւ այլ արեւմտյան կառույցների մոտ»։