- 21/05/2022
Ադրբեջանը Լաչինի միջանցքին փոխարինող զուգահեռ այլ ճանապարհ է կառուցում, ինչը ուղղակիորեն սպառնում է Բերձորի ու Աղավնոյի կորցնելուն․ ԱՀ ԱԺ պատգամավոր
![Ադրբեջանը Լաչինի միջանցքին փոխարինող զուգահեռ այլ ճանապարհ է կառուցում, ինչը ուղղակիորեն սպառնում է Բերձորի ու Աղավնոյի կորցնելուն․ ԱՀ ԱԺ պատգամավոր](https://soyuz.iravunk.am/wp-content/uploads/2022/05/272932058_5119118124799509_3443617206724664921_n.jpg)
Արցախի ապագայի, Բերձորի եւ Աղավնոյի բնակիչներին սպառնացող առկախված վտանգների, կիսանախագահական համակարգի անցնելու շուրջ ստեղծված աժիոտաժի շուրջ զրուցել ենք ԱՀ ԱԺ պատգամավոր ԿԱՐԵՆ ՀՈՎՀԱՆՆԻՍՅԱՆԻ հետ։
-Պարոն Հովհաննիսյան, ակնհայտ է, որ մոտենում է խաղաղության պայմանագրի ստորագրման վերջնական փուլը, ինչպե՞ս եք տեսնում Արցախի ապագան, առկա մարտահրավերների պարագայում, ի՞նչ է սպասվում արցախցի մեր հայրենակիցներին խաղաղության պայմանագրի կյանքի կոչվելուց հետո։
-Ճիշտն ասած համամիտ չեմ վերջնական փուլ հնչեցրած ձևակերպման հետ, որովհետև նույնիսկ, այսպես ասած, առաջին փուլն էլ այլ տրամաբանության մեջ է, մասնավորապես եթե ելակետային ենք ընդունում նոյեմբերի 9 հայտարարությունը, ապա Ադրբեջանը չի կատարել իր պարտականությունները՝ չի վերադարձրել իր մոտ պահվող հայ ռազմագերիներին, նույն տարվա մեջ դեկտեմբեր ամսին գրավել է Խծաբերդը , մուտք է գործել ՀՀ սուվերեն տարածք՝ Սեւ լճի շրջակայք ու նմանապես այլ դեպքեր, հետեւաբար դեռ շատ վաղ է խոսել վերջնական փուլ կոչվածի մասին։
Իսկ Արցախի ապագան արցախահայությունը տեսնում է միջազգային հանրության կողմից իր ինքնորոշման իրավունքի ճանաչման մեջ, որը հակիրճ ձեակերպոցին ԱՀ ԱԺ հինգ խմբակցությունները ու որոշումը ընդունվեց միաձայն ամբողջ խորհրդարանի կողմից։
-Դուք նշեցիք, որ Արցախի հայությունը իր ապագան տեսնում է ինքնորոշման միջազգային իրավունքի ճանաչմամբ, արդյո՞ք ներկաՀՀ իշխանությունների կողմից տեսնում եք միջազգային ճանաչմանը միտված քայլեր։
-ՀՀ Ներկա իշխանությունները Արցախի միջազգային ճանաչման գործընթացներում հակասական մտքեր են շարադրում, չկա հստակ խոսք որպեսզի արցախահայությունը ընկալի և վստահի։ Հետևաբար, խառնաշփոթ իրավիճակում, վստահության մասին խոսելը պարզամտություն կլինի։
-Պարոն Հովհաննիսյան, վերջին օրերին, հասարակության ուշադրությունը սևեռված է Աղավնոյի վրա։ Ի՞նչ ռեալ վտանգներ են սպառնում Աղավնոյում բնակվող մեր հայրենակիցներին և ի՞նչ նոր մարտահրավերների առաջ են այսօր կանգնած տեղի բնակիչները։
-Աղավնոյի եւ ոչ միայն Աղավնոյի, նաև Բերձորի բնակիչները մայիսի 18- ին նշեցին Բերձորի ազատագրման 30-ամյակը՝ մի ճանապարհ, որի ազատագրմամբ փրկվեց արցախահայությունը և ուղղակի ցամաքային կապ հաստատվեց մայր հայրենիքի հետ։ Վտանգը մեծ է, որ Ադրբեջանը Լաչինի միջանցքին փոխարինող զուգահեռ այլ ճանապարհ է կառուցում, որը որպես այլընտրանք է լինելու ներկա ճանապարհին՝ ցամաքային կապ ապահովելով Արցախի և ՀՀ միջեւ, ինչը ուղղակիորեն սպառնում է կորցնելու վերը նշված բնակավայրերը։
-Եվ վերջում, Արցախում նախատեսվում է անցում կատարել կառավարման կիսանախագահական համակարգի, ինչո՞ւ հիմա նման որոշում կայացվեց։
-Կիսանախագահական համակարգին անցումը կատարվում է ոչ թե այսօր կամ վաղը, այլ ավելի ուշ, երբ պատրաստ կլինի նոր Սահմանադրության հայեցակարգը, ինչը վերջնական տեսքով կդրվի հանրաքվեի, որից հետո երևի տեղի կունենան համապատասխան համապետական ընտրություններ։ Հիմա, ուղղակի նոր Սահմանադրության հայեցակարգը է դրված քննարկումների շրջանառության մեջ և անիմաստ աժիոտաժը տեղին չէ։ Ըստ մեր կուսակցության պատկերացումների, կիսանախագահական կառավարման համակարգը առավել հարմար կլինի ներկա Արցախի կյանքը կառուցելու, մարտահրավերներին դիմակայելու գործում։
Զրույցը՝ ԻԼՈՆԱ ԱԶԱՐՅԱՆԻ