- 14/09/2022
Ինչո՞ւ Նիկոլը «թռավ» ՇՀԿ գագաթնաժողովից
Ստեղծված իրավիճակով պայմանավորված Հայաստանի Հանրապետության վարչապետը չի մասնակցելու Սամարղանդում կայանալիք Շանհայի համագործակցության կազմակերպության նիստին:
Ավելի վաղ ՌԴ ԱԳՆ-ն հայտնել էր, որ Հայաստանի վարչապետ Նիկոլ Փաշինյանն ու Ադրբեջանի նախագահ Իլհամ Ալիևը հաստատել են ՇՀԿ գագաթնաժողովին մասնակցելու իրենց մտադրությունը: Այնտեղ են լինելու նաեւ Պուտինն ու Էրդողանը, այսինքն, սա ներկա բախումները կանգնեցնելու ռեալ շանս է: Ու պարզ հարց է ծագում` ինչո՞ւ է Նիկոլն այդ շանսից հրաժարվում:
Կարելի է մտածել, որ այնտեղ կարող են ներկայացնել ինչ-որ փաստաթուղթ, որը նա ստիպված կլինի ստորագրել:
Կարելի է մտածել նաեւ, որ Սամարղանդում իրոք կա այս բախումները կանգնեցնելու ռեալ շանս, որից Նիկոլը «չգիտես ինչու» հրաժարվում է: Այնպես, ինչպես որ շանսեր կային 44-օրյա պատերազմի ժամանակ, որոնք օգտագործելուց Նիկոլը հրաժարվեց:
Թե՞ կա մի այլ պատճառ. կտեսնենք: Հա, կարելի է նաեւ մտածել, թե բունկերներում ծվարած ինչպե՞ս է գնալու ՇՀԿ: Սակայն չմոռանանք, որ չգնալու մասին հայտարարվեց մինչ բունկեր գնալը, այսիննք, որոշումը կայացվել է մինչ ժողովրդական մեծ մասսա հավաքվելը:
Ամեն դեպքում, երբ մինչ այդ ՌԴ ԱԳՆ-ն տեղեկացրել է, որ Նիկոլն ու Ալիևը հաստատել են Սամարղանդում ՇՀԿ գագաթնաժողովին մասնակցելու մտադրությունը, ապա դա նշանակում է, որ դիվանագիտական խողովակներով նման նախնական պայմանավորվածություն եղել է, համենայնդեպս, հայտարարության պահի ՌԴ ԱԳՆ-ին այլ բան չեն հայտնել։ Այսինքն, որ չմեկնելու որոշում կայացել է դրանից հետո, այսպես ասած` վերջին պահին: Դա էլ ռեալ կլիներ, եթե այդ ընթացքում ստացվեր ինչ-որ տեղեկություն, որը կփոխեր պլանները: Դա, մի կողմից, կարող է խոսել Նիկոլի դեմ ինչ-որ փաստաթուղթ դնելու տարբերակի օգտին: Բայց նաեւ, որ նրան արեւմտյան ուղղությունից հուշել են, թե ավելի լավ է` չգնաս: Բայց այդ դեպքում կարող են մյուս կողմից եւս մեկ անգամ հուշել` ավելի լավ է, որ գաս, եւ այս որոշումը դեռ հնարավոր է, որ փոխվի:
Կարճ ասած, նման է նրան, որ այստեղ է վերջին օրերի իրադարձություններն ավելի լավ պատկերացնելու բանալին:
