Ղրիմի կամրջով երթևեկությունը կվերսկսվի մոտ ժամանակներս. Ակսյոնով

Ղրիմի ղեկավար Սերգեյ Ակսյոնովը հայտնել է, որ ամենամոտ ժամանակներս Ղրիմի կամրջով կվերսկսվի մեքենաների և գնացքների շարժը։

«Դաշնային և տարածաշրջանային իշխանությունների համատեղ աշխատանքի շնորհիվ ամենամոտ ապագայում Ղրիմի կամրջի ավտոմոբիլային հատվածով երթևեկությունը կվերսկսվի՝ երկու չվնասված երթուղիներով»,- գրել է նա Telegram ալիքում։

Ակսյոնովը հավելել է, որ մինչեւ օրվա վերջ նախատեսվում է կամրջով սկսել երկաթուղային երթեւեկությունը։

ՌԴ տրանսպորտի նախարարության ղեկավար Վիտալի Սավելևի խոսքով՝ ճանապարհի անձեռնմխելի հատվածի վիճակը թույլ է տալիս այսօր ժամը 16:00-ից հետո Ղրիմի կամրջով մեքենաների երթևեկությունը սկսել մեկ երթևեկելի գոտում՝ հետընթաց ռեժիմով։

Հիշեցնենք, որ այսօր առավոտյան Ղրիմի կամրջի վրա բեռնատարի պայթյունի հետևանքով 3 մարդ է զոհվել։ ՌԴ Քննչական կոմիտեն այս պահին հետաքննում է միջադեպը։ Հաղորդվում է, որ բեռնատարի վարորդը և դրա սեփականատերը Կրասնոդարի երկրամասի բնակիչ են, նրա բնակության վայրում արդեն սկսվել են քննչական գործողություններ։ Մեքենայի շարժման երթուղին և համապատասխան փաստաթղթերը ուսումնասիրվում են։