Ուկրաինացի փախստականներին վաճառում և բռնաբարում են. Եվրախորհրդարանն ահազանգում է

Եվրախորհրդարանն ահազանգում է, որ Եվրոպայում արձանագրվել է մարդկանց թրաֆիքինգի, ուկրաինացի փախստականների սեռական և աշխատանքային շահագործման կտրուկ աճ։ Այս մասին հայտնում է Euractiv-ը։

Հրապարակման մեջ ասվում է, որ ուկրաինացի զոհերի թրաֆիքինգն արդեն իսկ հաստատված է, և հանցավոր ցանցեր գործում են Ուկրաինայի և Եվրոպայի և Կենտրոնական Ասիայի երկրների միջև։

ՄԱԿ-ի փախստականների հարցերով գործակալության՝ ՄԱԿ ՓԳՀ-ի վերջին տվյալների համաձայն, փետրվարից 8,3 միլիոն ուկրաինացիներ, որոնց 80%-ը կանայք են, տեղահանվել են Եվրոպա։ Կանայք առավել հաճախ օգտագործվում են, սովորաբար սեռական շահագործման համար:

Ըստ Եվրոպայում ՄԱԿ-ի կանանց կազմակերպության փոխտնօրեն Ջո-Անն Բիշոփի, այս ռիսկն ավելի է մեծանում այն ​​փաստով, որ թրաֆիքինգները գնալով ավելի են հավաքագրում մարդկանց առցանց հարթակների միջոցով: