Ռուսաստանն ու Չինաստանը հերթական համատեղ զորավարժություններ են սկսել

Ռուսաստանի Դաշնության պաշտպանության նախարարությունը հայտնել է, որ խաղաղօվկիանոսյան նավատորմի նավերի ջոկատը՝ «Վարյագ» հրթիռային հածանավի գլխավորությամբ, Վլադիվոստոկից բաց ծով է դուրս եկել՝ մասնակցելու ռուս-չինական ռազմածովային «Ծովային փոխգործակցություն» զորավարժություններին, փոխանցում է ՏԱՍՍ-ը։
Զորավարժությունների ակտիվ փուլում, որը սկսվել է այսօր Արևելաչինական ծովի ջրերում, կիրականացվեն համատեղ հրթիռային և հրետանային կրակ օդային թիրախների ուղղությամբ, ինչպես նաև համատեղ հակասուզանավային գործողություններ կմշակվեն՝ զենքի գործնական կիրառմամբ։
Ավելի վաղ ՌԴ ԱԳ նախարար Սերգեյ Լավրովը հայտարարել էր, որ ՆԱՏՕ-ի և եվրոպական երկրների գործողությունները պայթյունավտանգ իրավիճակ են ստեղծում Ասիա-խաղաղօվկիանոսյան տարածաշրջանում, ինչին ի պատասխան՝ Ռուսաստանի Դաշնությունն ու Չինաստանը ամրապնդում են ռազմական համագործակցությունը և համատեղ վարժանքներ են անցկացնում։