• 28/01/2023

ՀՀ-ն չի հրաժարվել սահմանին ՀԱՊԿ առաքելության տեղակայումից․ Նիկոլի նոր շրջադա՞րձը

ՀՀ-ն չի հրաժարվել սահմանին ՀԱՊԿ առաքելության տեղակայումից․ Նիկոլի նոր շրջադա՞րձը

Հայաստանը չի հրաժարվել Ադրբեջանի հետ սահմանին Հավաքական անվտանգության պայմանագրի կազմակերպության (ՀԱՊԿ) առաքելության տեղակայումից: Այս մասին ՏԱՍՍ-ի թղթակցի հետ զրույցում հայտնել է Ռուսաստանում Հայաստանի դեսպան, նոյեմբերի 9-ից հետո հսկայական հողեր ազերիներին նվիրած պաշտպանության նախկին նախարար Վաղարշակ Հարությունյանը։

« Գիտեք, որ միջպետական հարաբերություններում կարող են լինել ինչ-որ հարցեր, որոնք քննարկվում են և որոնց լուծումներ են գտնում։ Ինչ վերաբերում է ՀԱՊԿ դիտորդներին, ապա ՀԱՊԿ դիտորդներից ոչ ոք չի հրաժարվել։ Փաստաթուղթը, որը պետք է ստորագրվեր Երևանում ՀԱՊԿ գլխավոր քարտուղարի և միացյալ շտաբի պետի՝ տարածաշրջան կատարած այցի արդյունքում, չստորագրվեց այն պատճառով, որ հայկական կողմը ցանկանում էր լրամշակել փաստաթուղթը։ Ահա այդ փաստաթուղթը լրամշակման փուլում է»,- նշել է նա։

Հարությունյանը նաև հերքել է որոշ հայ քաղաքագետների և ընդդիմադիր գործիչների հայտարարություններն այն մասին, որ վարչապետ Նիկոլ Փաշինյանի կառավարությունը նախապատրաստում է ՀԱՊԿ-ից երկրի դուրս գալը։

«Նման մոտեցումները կամ կարծիքները չեն համապատասխանում իրականությանը այն առումով, որ պետությունների միջև հարաբերությունները որոշվում են այն պայմանագրերով, որոնք ստորագրվել են, և այդ պայմանագրերը, որոնք ստորագրվել են դեռևս 90-ական թվականներին, այժմ շարունակում են գործել։ Դուք շատ լավ գիտեք, որ մեր երկրների առաջնորդների միջև տասնյակ հանդիպումներ և հեռախոսազրույցներ են եղել։ Վարչապետ Նիկոլ Փաշինյանը նշել է, որ ՀԱՊԿ-ից դուրս գալու մասին խոսք անգամ լինել չի կարող, դրա համար դա չի համապատասխանում իրականությանը։ Ընդհակառակը, ունենք մեր փոխհարաբերությունների խորացում և այսպիսի անկայուն ժամանակահատվածում մեր հարաբերությունները խորանում են և խորանալու են։ Եվս մեկ անգամ ուզում եմ կրկնել, որ Հայաստանը ԵԱՏՄ անդամ է, ՀԱՊԿ անդամ է, ԱՊՀ անդամ է և տարածաշրջանային բոլոր այլ կազմակերպությունների անդամ, որտեղ ներկա է նաև Ռուսաստանը»,- հավելել է նա։

Այն, որ սույն անհասկանալի դեսպանը` Վաղոն առանց Նիկոլի հրամանի բերանն անգամ չի համարձակվի բացել, հին փաստ է: Ու ի՞նչ է ստացվում, Նիկոլը հրամայել է ռուսական մամուլով տարածել, թե ինքն ամենեւին էլ դեմ չէ՞ ՀԱՊԿ-ին: Ուրեմն, նորից ինչ-որ բա՞ն է փոխվել, թե՞մոռացել են բրիտանական Mi6-ի ղեկավարի մասին: