- 25/02/2023
Մեդվեդեւն ասել է, թե ինչպիսին կարող են լինել բանակցություններն Ուկրաինայի հետ եւ ինչ կլինի դրանցից հետո
Ռուսաստանի Անվտանգության խորհրդի փոխնախագահ Դմիտրի Մեդվեդեւի կարծիքով՝ Կիեւի վարչակարգի դեմ հաղթանակի օրը գալու է, բայց դրանից հետո լինելու են «ծանր եւ նյարդային բանակցություններ»։ Այս մասին Մեդվեդեւը գրել է իր Telegram-ալիքում։
Քաղաքական գործիչը բանակցությունների դժվարությունները բացատրել է նրանով, որ Ուկրաինայի կողմից դրանց ֆորմալ մասնակիցներն այլ մարդիկ են, իսկ «փաստացի ղեկավարները՝ միանգամայն այլ մարդիկ»։
Մեդվեդեւը հայտարարել է, որ Արեւմուտքը շահագրգռված չէ հակամարտության դադարեցմամբ, բայց, վաղ թե ուշ, արեւմտյան երկրների ղեկավարները ստիպված կլինեն անել դա, ինչը կհանգեցնի «ինչ-որ համաձայնության»։
«Առանց իրական սահմանների կամ Եվրոպայի անվտանգությունն ապահովող նոր Հելսինկյան պակտի մասին հիմնարար պայմանավորվածությունների»,- ավելացրել է Մեդվեդեւը։
Այնուհետեւ, ըստ Մեդվեդեւի, կգա դիմակայության էլ ավելի բարդ ժամանակ։
«Դիմակայության, հիստերիկաների եւ անտաշությունների հյուծիչ ամիսներ եւ տարիներ՝ նրանց կողմից, ովքեր կառավարելու են այն կռճոնը, որը կմնա Ուկրաինայից»,- համոզված է նա։
Քաղաքական գործիչը նշել է, որ դա չի կարելի թույլ տալ, ուստի անհրաժեշտ է հասնել հատուկ ռազմական գործողության բոլոր նպատակներին՝ «որքան հնարավոր է հեռու վանել սպառնալիքների սահմանը ՌԴ-ից, անգամ եթե դրանք լինեն Լեհաստանի սահմանները»։
«Ոչնչացնել նեոնացիզմը հիմնահատակ, որպեսզի հետո ժամանակ չծախսվի մալոռուսական անտառներում բանդերական բանդաների մնացորդներին որսալու վրա, որպեսզի աշխարհը երկար սպասված հանգստությունն ստանա»,- ասել է Մեդվեդեւը։
