Կրեմլը հայտնել է Թուրքիայի և Իրանի նախագահների հետ Պուտինի վաղվա բանակցությունների թեման

Ռուսաստանի, Թուրքիայի և Իրանի նախագահների հուլիսի 19-ին կայանալիք բանակցությունների հիմնական թեմաները կլինեն երկկողմ համագործակցության հարցերը, հայտնել են Կրեմլում։

Հիշեցնենք, որ Ռուսաստանի ղեկավարը վաղը՝ հուլիսի 19-ին, Թեհրանում երկկողմ և եռակողմ հանդիպումներ կանցկացնի։ Բանակցություններ կանցկացվեն Իրանի և Թուրքիայի նախագահներ Իբրահիմ Ռաիսիի և Ռեջեփ Թայիփ Էրդողանի հետ: Պուտինը կհանդիպի նաև Իրանի գերագույն կառավարիչ Ալի Խամենեիի հետ։

Կրեմլն ընդգծել է, որ Սիրիայում Աստանայի կարգավորման գործընթացի երաշխավոր երկրների ղեկավարների հանդիպումը «շատ կարևոր և տեղին է», մասնավորապես, այն «լավ հնարավորություն կլինի նշված պետությունների ղեկավարների հետ քննարկելու տարածաշրջանային և միջազգային խնդիրները»:

«Մենք հնարավորություն կունենանք քննարկելու երկկողմ հարաբերությունները, առաջին հերթին առևտրատնտեսական կապերը թե՛ Իրանի և թե՛ Թուրքիայի հետ, քաղաքական երկխոսությունը շարունակելու հեռանկարներն ու բոլոր եղանակները»,- Իրանի պետական ​​հեռուստառադիոընկերությանը տված հարցազրույցում բացատրել է ՌԴ նախագահի խոսնակ Դմիտրի Պեսկովը։