25 օրից Նահանգներում դիզելային վառելիք չի մնա. Fox News

Fox News-ի հաղորդավար Թակեր Կարլսոնը հայտարարել է, որ ԱՄՆ նախագահ Ջո Բայդենի քաղաքականությունը Ուկրաինայի հարցում կզրկի ԱՄՆ-ին դիզվառելիքից։

«Ըստ Էներգետիկայի տեղեկատվության վարչության տվյալների՝ 25 օրից Նահանգներում դիզելային վառելիք չի մնա։ Ի՞նչ է լինելու։ Ամեն ինչ կկանգնի»,- ասաց լրագրողը՝ նշելով, որ բեռնատարները, գյուղտեխնիկան չեն կարողանա աշխատել։

Նա, մասնավորապես, ուշադրություն է հրավիրել Մոսկվայի դեմ սահմանափակող միջոցների հետեւանքների վրա։

«Նավթամթերքի ներկրման արգելքը պետք է «պատժեր Պուտինին»։ Ի՞նչ եղավ վերջում։ Ռուսական ռուբլին ուժեղացել է ավելին, քան մեկ տարի առաջ էր: Եվրոպական տնտեսությունը, մինչդեռ, փլուզվում է»,- Ռուսաստանի դեմ պատժամիջոցների հետեւանքների մասին ասել է հեռուստահաղորդավարը։

Նա նաեւ հավելել է, որ ԱՄՆ ռազմավարական պահուստից Չինաստանին նավթի վաճառքը նույնպես, ենթադրաբար, պետք է վնասեր Կրեմլին, սակայն դա տեղի չի ունեցել։ Կարլսոնը նշել է, որ այս բոլոր միջոցները միայն աղքատացրել են Միացյալ Նահանգները։

Հարցին, թե ինչպես կարելի է արդարացնել իշխանությունների կողմից նման անհիմն գործողությունները, հաղորդավարը մեջբերում է Մերիլենդի կոնգրեսական Ջեյմի Ռասկինի հայտարարությունը, ով ասել է, որ Ռուսաստանը ուղղափառ քրիստոնյա երկիր է՝ ավանդական արժեքներով, ուստի այն պետք է ոչնչացվի։ Ընդ որում, Կարլսոնի խոսքով, կոնգրեսականն այն անվանել է ոչ թե սովորական պատերազմ, այլ` «ջիհադ»։

Չմոռանանք նաեւ, որ արդեն նոյեմբերի 1-ից ուժի մեջ է մտնելու ՕՊԵՔ-ի եւ ՌԴ-ի պայմանավորվածությունը` նավթի համաշխարհային արդյունահանումը օրեկան 2 միլիոն բարելով կրճատման մասին: Դա ենթադրում է համաշխարհային գների նոր թռիչք, որի տակից դժվար է ասել, թե ինչպես է Բայդենը դուրս գալու: