Ուկրաինայի վերաբերյալ Մերկելի խոստովանությունը ցույց տվեց Ռուսաստանի նկատմամբ իրական վերաբերմունքը. Global Times

Գերմանիայի նախկին կանցլեր Անգելա Մերկելի հայտարարությունը մինսկյան պայմանավորվածությունների մասին ցույց տվեց հավաքական Արևմուտքի կեղծավոր վերաբերմունքը Ռուսաստանի նկատմամբ, գրում է Global Times-ը։

Ավելի վաղ քաղաքական գործիչը հայտարարել էր, որ Մոսկվայի հետ պայմանավորվածություններն Ուկրաինային «ժամանակ տալու» փորձ էին։ Նախկին կանցլերն ասել է, որ կասկածում է, որ ՆԱՏՕ-ի երկրները կարող էին անել այնքան, որքան հիմա անում են Ուկրաինային օգնելու համար:

«Արևմուտքը երբեք Ռուսաստանին իրականում չի դիտարկել որպես երկխոսության գործընկեր։ <…> Մերկելի խոստովանությունը մինսկյան պայմանավորվածությունների մասին ցույց տվեց նաև, որ որոշ արևմտյան երկրներ, հատկապես ԱՄՆ-ը, ընդհանրապես չեն կատարում պայմանագրային պարտավորությունները։ Նրանք շատ հեշտությամբ կարող են հետ վերցնել իրենց խոսքերը»,- ասվում է հոդվածում։

Հրատարակությունը նշում է, որ ԱՄՆ-ը և նրա դաշնակիցները ցանկանում էին Մոսկվային ներքաշել Կիևի հետ հակամարտության մեջ, և ճգնաժամի կարգավորումը երբեք չի բավարարել նրանց շահերին։ Հոդվածի հեղինակը հավելում է, որ Վաշինգտոնի գործընկերներից շատերի համար Ռուսաստանը միշտ պոտենցիալ թշնամի է մնացել Խորհրդային Միության փլուզումից հետո՝ իր հսկայական ռազմական հզորության և քաղաքական համակարգի շնորհիվ։