ՌԴ Սևծովյան նավատորմի ավելի քան 30 նավ ծով են դուրս եկել Ղրիմի ափերի մոտ

ՌԴ Սևծովյան նավատորմի երեք տասնյակ նավեր կմասնակցեն լայնածավալ զորավարժություններին: Այս մասին լրագրողներին հայտնել են նավատորմի տեղեկատվական աջակցության բաժնում։

«Սևծովյան նավատորմի ավելի քան 30 նավ ծով են դուրս բերել Սևաստոպոլից և Նովոռոսիյսկից՝ համաձայն զորավարժությունների պլանի»,- ասվում է հաղորդագրության մեջ։

Դրանց թվում են ֆրեգատներ, պարեկային և փոքր հրթիռային նավեր, հրթիռային նավակներ, դեսանտային և փոքր հակասուզանավային նավեր, ինչպես նաև ականային պաշտպանության նավեր։

Զորավարժությունների ընթացքում ռազմածովային կազմավորումները, առափնյա զորքերի ստորաբաժանումները և նավատորմի ավիացիան կիրականացնեն հրթիռային և հրետանային կրակոցներ, հարվածներ կհասցնեն ծովին, առափնյա և օդային թիրախներին։

Զորավարժությունները ղեկավարում է Սևծովյան նավատորմի հրամանատար Իգոր Օսիպովը։

Նրանց նպատակն է պաշտպանել Ղրիմի ափը, Սևծովյան նավատորմի բազաները, տնտեսական հատվածի օբյեկտները, ինչպես նաև ծովային հաղորդակցությունները և ծովային տնտեսական գործունեության ոլորտները հնարավոր ռազմական սպառնալիքներից:

Ընթացիկ զորավարժությունները կդառնան ռազմածովային զորավարժությունների նախապատրաստման մի մասը՝ նավատորմի գլխավոր հրամանատար, ծովակալ Նիկոլայ Եվմենովի գլխավոր հսկողության ներքո։

Դրանց մասնակցելու համար նախատեսվում է ներգրավել ավելի քան 140 ռազմանավ և օժանդակ նավեր, ավելի քան 60 ինքնաթիռ, հազար միավոր ռազմական տեխնիկա և մոտ տասը հազար զինվորական։