Լուլուն գողացավ Արմեն Գեւորգյանի դրոշը

Խորհրդարանական ընդդիմության եւ իշխանության դրոշակռիվը հրապարակներից տեղափոխվեց Ազգային ժողով, ու չի բացառվում, որ հասնի մինչեւ Էվերեստ: Մինչ խորհրդարանական երկու ընդդիմադիր խմբակցությունների պատգամավորներն իրենց սեղաններին ու ԱԺ ամբիոնին «հերոսաբար» փակցրել էին Արցախի դրոշը, իսկ ՔՊ-ական պատգամավոր Վահագն Ալեքսանյանը նույնքան «հերոսաբար» «պոկել էր» այն Աժ ամբիոնից, մեկ այլ ՔՊ-ական պատգամավոր` ԼՈՒՍԻՆԵ ԲԱԴԱԼՅԱՆԸ, որոշեց մի հերոսական դրվագով էլ ինքն անմահանալ այս դրոշակռվում: Ո՛չ ավել, ո՛չ պակաս Լուլուն ԱԺ ամբիոնից հայտարարեց, որ եթե իմանա, թե Արցախի դրոշը Էվերեստի գագաթին դնելով` բոլոր խնդիրները լուծվելու են, ապա կանի անհնարինը եւ հենց վաղը կփորձի բարձրանալ Էվերեստի գագաթ: Եվ մինչ ինքն իր հուզիչ ելույթից տպավորված` նա հեռանում էր ԱԺ ամբիոնից, հանկարծ հիշեց, որ Էվերեստ տանելու համար Արցախի դրոշ չունի:

«Իրավունքի» աչքից չվրիպեց այն, որ տեսախցիկների աչքի առաջ Լուսինե Բադալյանը գողացավ ԱԺ «Հայաստան» խմբակցության պատգամավոր Արմեն Գեւորգյանի սեղանին դրված Արցախի դրոշը: Եվ որպեսզի տեսարանն ունենար առավել հուզիչ եւ կուլմինացիոն բնույթ, որոշեց ծածանելով ու հեզաճկուն քայլվածքով հասնել իր պատգամավորական աթոռին` հաղթական դրոշը տնկելով իր սեղանին: Ահա այն ամենը, ինչ պետք է իմանալ, թե ինչով են զբաղված օրենսդիրները խորհրդարանում` այս օրհասական պահին:

ՀՐԱՆՏ ՍԱՐԱՖՅԱՆ