• April 15, 2022

Նիկոլի «ինքնախոստովանական ցուցմունքը», ուրիշ ոչինչ

Նիկոլի «ինքնախոստովանական ցուցմունքը», ուրիշ ոչինչ

Նախօրեին ԱԺ-ում Նիկոլի ունեցած ելույթի հիմնական իմաստը, իհարկե, Արցախն ու հայ-ադրբեջանական թեման էր, ավելի կոնկրետ, թե ինչ է պատրաստվում այդ ուղղություններով անել: Բայց մինչ դրան հասնելը, արժե հակիրճ մեկ դրվագի եւս անդրադառնալ:

«Բացասականը գերակշռում է»

Այսպես, սկսելով խոսքը, նա հայտարարեց. «2021 թվականը հետպատերազմական առաջին տարին էր, եւ տարվա ընթացքում մենք ունեցանք լրջագույն ձախողումներ եւ լրջագույն ձեռքբերումներ…»:
Սկսելով ձեռքբերումներ ասվածից, Նիկոլը ցնցող օրինակներ բերեց: Նախ, ձեռքբերում է համարում իր վերարտադրությունը խորհրդարանական ընտրություններում: Թե ինչպես դա տեղի ունեցավ, հայտնի փաստ է. ողջ իշխանական համակարգի ամենաբիրտ օգտագործում, ընդդիմության հիմնական համարվող ուժի տարօրինակ, եթե ոչ` դավաճանական գործողություններ, եւ ձայների 1/4-ով սահմանադրական մեծամասնություն: Այո, ձեռքբերում էր, միայն թե ո՞ւմ համար. նիկոլյան խունտայի: Սակայն այն, որ ջախջախված իշխանությունը մնաց կառավարման ղեկին, դա արդեն իսկ ծանրագույն հարված էր պետությանը, որից, ով գիտի, Հայաստանը եւ Արցախը կկարողանա՞ն մեջքը շտկել: Կարճ ասած, Նիկոլի այդ «ձեռքբերումը» իրականում ամենամեծ չարիքներից մեկն էր, որը մեր երկիրը տեսավ վերջին 100 տարում:
Այնուհետեւ նա ձեռքբերում է համարում «մակրոտնտեսական կայունության ապահովելը» եւ պետական ծախսեր կատարելը, այդ թվում` Արցախում: Իսկ թե ինչ է դրա տակ, խոսելու առիթներ շատ ենք ունեցել. արտաքին պարտքի հսկայական թռիչքներ, որով ինչքան էլ «մակրոտնտեսական կայունություն ապահովես»: Վարկեր վերցրել ու նման ծախսեր են արել` դրանով երկրի տակ դանդաղ գործողության ռումբ դնելով, ու դա «մակրոտնտեսական կայունություն» են համարում:
Ու վերջ, էլ ոչ մի ձեռքբերում, անգամ նա է խոստովանում. «2021 թվականի վերաբերյալ մեր բոլորի զգացողություններում բացասականը գերակշռում է»: Ու նման խոստովանությունից հետո նա դեռ իրեն վարչապե՞տ է համարում: Իսկ երեկ էլ հասավ ամենախայտառակ մտքին, թե` «Հայաստանի եւ Արցախի լինել չլինելու մասին ենք խոսում»: Իսկ «հանցավոր նախկինների» օրեք նման հարցադրում ո՞ւմ մտքով կանցներ: Ահա եւ «Նիկոլ վարչապետը»` իր իսկ «ինքնախոստովանական ցուցմունքներով» ապացուցեց, որ երկիրը հասցրել է անդունդի եզրին:

ՀԵՐԹԱԿԱՆ ՍԱԴՐԱՆՔԸ ԽԱՂԱՂԱՊԱՀՆԵՐԻ ԴԵՄ

Նիկոլի ելույթի այս դրվագին անդրադարձանք մեկ պարզ պատճառով. 2020թ. խայտառակ պարտությունից հետո Հայաստանը մազաչափ անգամ առաջ չի գնացել (լինել-չլինելու հեռանկարն էլ փեշքեշ), որ կարողանար աստիճանաբար նաեւ իր անվտանգային, արտաքին քաղաքական վիճակը սկսեր բարելավել: Ու եթե, մեղմ ասած, մնացել ենք 2020թ.-ի ջախջախված վիճակում, պարզ հարց է ծագում` ներկա բարդ իրավիճակում Հայաստանն ինչպե՞ս է փորձելու ինչ-որ կերպ իր շահերը պաշտպանել: Այն դեպքում, երբ աչքի առաջ զարգացող թշնամին եւս պարզ տեսնում է այս վիճակը, եւ դա արդեն իսկ բավական է, որ նա Նիկոլի քարոզած «հաշտությանը» գնալու փոխարեն, ամեն ժամ ու օր նոր պահանջներ առաջադրի. եթե կարող է առավելագույնը պոկել, ինչո՞ւ չանի:
Այստեղ է, որ նորից ու նորից օրակարգ է գալիս իր հերթին հայտնի ու շատ պարզ հարցը` իսկ ինչպե՞ս է նման երկիրը գոյատեւում: Պատասխանը նույնքան պարզ է. եթե չլինեին ռուսական զորքերը, հազիվ թե հիմա Արցախ լիներ, իսկ Հայաստանը լավագույն դեպքում «ձեւի համար» կպահպանվեր, բայց որպես թրքահպատակ: Սա՞ է նիկոլյան խունտայի ուզածը. այս հայտնի հարցն այս անգամ մի կողմ թողնենք, պատասխանը երեւի արդեն անգամ ամենամոլի «զոմբին» է հասկանում: Պարզապես ֆիքսենք հերթական փաստը. ռուսական բանակի հաշվին Հայաստանն ու Արցախը գոյատեւում են, մինչդեռ նույն նիստում Նիկոլն ու իր «Օմեգան» հերթական «սապոնը դրեցին» խաղաղապահների ոտքի տակ: Դա էլ մի կողմ, այս իրավիճակում բավական տարօրինակ էր նաեւ թիվ 1 ընդդիմության պահվածքը:
Թե ինչու է այս օրերին թիվ 1 ընդդիմությունը ամենուր Արցախի դրոշներ տեղադրում, այդպես էլ «չհասկացանք»: Հա, էլի մեր Արցախն է, էլի պարտավոր ենք բոլորով հանուն այդ դրոշի գոյության ամեն ինչ անել: Բայց մեկ է, ամենուր դրոշ տեղադրելն այդ ի՞նչ «հանճարեղ ռազմավարական քայլ է», մնում է անորոշ: Ու նույնքան «անհասկանալի» է Արցախ մեկնելու վերջին քայլը, երբ բոլորի համար պետք է որ վաղուց պարզ լիներ, որ Արցախի փրկության հարցն այս օրերին պետք է լուծել Երեւանում: Ու գալիս է հաջորդ «անհասկանալի» դրվագը. իսկ Բաքուն այդ ինչպե՞ս Արցախ մեկնող ընդդիմադիր պատգամավորների ցուցակը տվեց ռուսներին` կոշտ պահանջով: Ու հիմա հարց ոչ թե մեր իշխանություններին, այլ` ընդդիմությանը. հնարավո՞ր էր Արցախում հերթական լուրջ սրացումը, եթե ռուսները նրանց թողնեին անցնել: Նաեւ հնարավո՞ր էր այդ սրացման արդյունքում առնվազն նոր զոհեր, էլ չենք խոսում այն հերթական արշավի մասին, թե, տեսեք, խաղաղապահներն իրենց գործը լավ չեն անում: Ընդ որում, եթե թիվ 1 ընդդիմությունը բացատրի, թե այդ այցով մի այնպիսի փայլուն ծրագիր էին իրականացնում, որը կարող էր արագորեն մեր վիճակը դեպի դրական հուն ուղղել, միգուցե պետք կլիներ հաշտվել հնարավոր թվարկված կորուստների հետ: Բայց չեն բացատրում: Ու փոխարենը, Նիկոլն ու իր «Օմեգան» էլի առիթը բաց չթողեցին հայտարարել, թե խաղաղապահներն այդ ովքե՞ր են, որ չեն թողնում մեր պատգամավորներին` անցնել Լաչինի միջանցքով: Ու հիմա մեկը կբացատրի՞, թե հայաստանյան ընդդիմության եւ իշխանության ներգրավմամբ այս ի՞նչ պատմություն էր, որ խաղաղապահներն ինչ էլ անեին, քննադատության էին արժանանալու: Հենց այն պահին, երբ Նիկոլը պետք է ԱԺ-ում մի այնպիսի ելույթ ունենար, որին ներկա գտնվելն ու դիքորոշում հայտնելը թիվ 1 ընդդիմության խորհրդարան գնալու միակ իմաստն էր: Ու հարց. այս ընդդիմությո՞ւնն ավելի լավը, թե` Նիկոլը:

ՈՉ ԹԵ «ՍԽԱԼ», ԱՅԼ` ԾՐԱԳԻՐ

Ինչ վերաբերում է Նիկոլի ելույթին, ապա այն կարելի է «ինքնախոստովանական ցուցմունքների» մի ամբողջ շարան համարել, ինչն ապագայում հաստատ պետք կգա: Այսպես, սպասելիորեն, նա խոսքը սկսեց «հանցավոր նախկիններից», թե` «ջեբս գցեցին», այդպես հասավ «Ադրբեջանին հանձնենք 7 հայտնի շրջանները» հնացած մեխանիզմին, եւ ցնցող ինքնախոստովանություն. «Այս ամենը պարտավոր էի մանրամասն ներկայացնել մեր ժողովրդին: Եվ սա չանելն է իմ իրական մեղքը, եւ մեղադրանքի նման ձեւակերպումը ամենեւին էլ իրավիճակը մեղմացնելու փորձ չէ, այլ ընդհակառակը` դրանով ավելի եմ սրում, որովհետեւ հանձնելով, գուցե կփրկեի հազարավոր կյանքեր, իսկ չհանձնելով` փաստորեն հազարավոր զոհերի հանգեցրած որոշումների հեղինակ դարձա: Եվ թերեւս նմանօրինակ դեպքերի համար է ծնվել հայտնի ասացվածքը, որն ասում է. դա ավելին է, քան հանցագործությունը, դա սխալ է: Կամ ինչպես մեր դեպքում կասեինք` դա ավելին է, քան դավաճանությունը, դա սխալ է…»:
Իսկ ո՞վ էր հրապարակավ հայտարարում` «Ժողովրդից թաքուն ոչինչ չեմ անի»: Այսպիսով նախ` Նիկոլը խոստովանում է, որ ժողովրդին խաբել է:
Երկրորդը, նա գիտակցել է, որ արդյունքը նույնն է լինելու, միայն թե կա°մ հազարավոր զոհերի գնով, կա°մ` առանց դրա: Եվ գիտակցված է զոհաբերել հազարներին` հասնելով, իր պատկերացմամբ, նույն արդյունքին, եւ ընդունում է, որ դա սխալ է: Բայց այդ դեպքում, որպես հազարավոր պատանիների ու երիտասարդների մահվան մեղավոր, ինչո՞ւ սեփական ոտքով բանտ չի գնում. հենց միայն այս փաստը ցույց է տալիս, որ այս ինքնախոստովանությունն էլ հերթական պոպուլիզմն է, բայց դա էլ նրան չի օգնելու:
Բանն այն է, որ այստեղ Նիկոլը մեկ բան «մոռացավ». այդ 7 շրջանի մեջ Հադրութն ու Շուշին չկային: Նաեւ այդ դեպքում ոչ միայն հազարավոր զոհեր չէինք տա, այլ բանակը կպահեր մարտունակությունը, ու հիմա այս ողբալի վիճակում չէինք լինի: Կարճ ասած, իր բնորոշմամբ` այս սխալը Հայաստանին կործանման շեմին է հասցրել, ու նրա այս հայտարարությունից հետո ապագա դատավարությունը շատ ավելի կարճ կտեւի: Ի դեպ, այս մասին պետք է մտածեն նաեւ այսքան ակտիվացած լամուկները:
Բացի այդ, ծիծաղելի է նաեւ նրա այն միտքը, թե ժամանակին պետք է «մանրամասն ներկայացնել մեր ժողովրդին»: Ոչ, ժամանակին այդ մասին բոլորն էին տեղյակ, մենք ինքներս քանիցս պարզ գրել ենք` պետք է գնալ «5+2» սցենարով (7 շրջանի մասին խոսելն էլ է բլեֆ), որի մասին, հիշեցնենք, դեռ 2019թ. գարնանը Մինսկի խումբը հրապարակային հայտարարությամբ հանդես եկավ` ներկայացնելով 3 տարրերից եւ 3 սկզբունքներից բաղկացած կարգավորման մեխանիզմը: Բլեֆ է նաեւ Նիկոլի այն միտքը, թե Ալիեւը դրան համաձայն չէր. Ալիեւը ՄԽ-ի այդ հայտարարությունից հետո հրապարակավ հավանություն է տվել: Դեմ էր միայն Նիկոլը, ով այդպես էլ հոդաբաշխ պատասխան չտվեց, թեեւ մասնավորապես մենք քանիցս խոսել ենք դրանից սպասվող հետեւանքների մասին, որը եւ ստացանք: Ու Նիկոլն իր քայլը հիմա սխա՞լ է անվանում: Ո°չ, դա սխալ չէր, դա միանգամայն գիտակցված քայլ էր: Ինչո՞ւ, այդ այդ հարցի պատասխանն է, որ պետք է ապագա դատավարությունը տա:

Քերոբ Սարգսյան

Առնչվող գրառում

Բայդեն Գուդն. ամերիկացիներից փող է վերցնում ու տալիս Ուկրաինային (Ֆոտո)

Բայդեն Գուդն. ամերիկացիներից փող է վերցնում ու տալիս Ուկրաինային…

Սոցցանցերում, այդ թվում` ամերիկյան ակտիվորեն շրջանառվում է նոր կատակը. «Ամերիկյան ֆոլկլորի նոր հերոսը Բայդեն Գուդն է։ Ամերիկացիներից փող է վերցնում ու…
ՎԴՎ-ի 7-րդ դիվիզիայի հրետանին ոչնչացնում է ուկրաինական ինքնագնաց հրետանին ´Տեսանյութ)

ՎԴՎ-ի 7-րդ դիվիզիայի հրետանին ոչնչացնում է ուկրաինական ինքնագնաց հրետանին…

7-րդ օդադեսանտային դիվիզիայի հրետանին ոչնչացնում է հակառակորդի ինքնագնաց հրետանին:
Մեր զորքերը հարձակման անցան Սնիգիրևկայի արևմուտքում. Իգոր Ստրելկով

Մեր զորքերը հարձակման անցան Սնիգիրևկայի արևմուտքում. Իգոր Ստրելկով

Դոնբասի բանակի հիմնադիր եւ առաջին հրամանատար Իգոր Ստրելկովը, ով ներկայումս Մոսկվայի պաշտոնական քաղաքականության քննարադության պատճառով զրկված է պատերազմին մասնակցելու հնարավորությունից, այս…