- 20/04/2022
Նիկոլական ապարատի նախկին պաշտոնյաները շտապում են հրապարակ
Մինչ «Հայրենիք» կուսակցության նախագահ, ԱԺ «Պատիվ ունեմ» խմբակցության ղեկավար Արթուր Վանեցյանը շուրջօրյա նստացույց է իրականացնում Ազատության հրապարակում, այնտեղ են շտապում նիկոլական ապարատի նախկին պաշտոնյաները: Ազատության հրապարակ էր այցելել ոչ միայն նախկին ոստիկանապետ Վալերի Օսիպյանը, այլ նաեւ ՊԵԿ նախկին նախագահ ԴԱՎԻԹ ԱՆԱՆՅԱՆԸ: Իր ներկայության վերաբերյալ նա ասաց, որ եկել է` իր ընկերներին բարեւելու:
– Պարոն Անանյան, Արթուր Վանեցյանը Ձեր ընկե՞րն է:
– Իհարկե, իմ աշխատանքային լավ ընկերն է: Եթե աջակցության տարր չունենար իմ բարեւելը, կարող էի հեռախոսով էլ զանգել ու բարեւել: Ակտիվ քաղաքականությամբ երբեք չեմ զբաղվել, սա համարեք որպես իմ քաղաքացիական պարտք: Եկա, ընկերներիս բարեւեցի, հիմա գնում եմ աշխատանքի:
– Իսկ ի՞նչ կասեք երկրում ստեղծված իրավիճակի մասին:
– Մարդկային լեքսիկոնում, երեւի թե, չկան այնպիսի բառեր, որոնք ճշգրիտ կբնորոշեն այն իրավիճակը, ինչ գոյություն ունի երկրում: Իրավիճակը, մեղմ ասած, լավը չէ:
– Դուք է՞լ եք իշխանափոխություն պահանջում` որպես երկիրը փրկելու ելք:
– Իշխանափոխությունը պետք է լիներ կամովին` 2020 թ. նոյեմբերի 10-ի առավոտյան: Սա իմ դիրքորոշումն է, որից չեմ հրաժարվում մինչեւ հիմա էլ:
ՀՐԱՆՏ ՍԱՐԱՖՅԱՆ
